قم سو ما يصبغ على الصين يا عيد
واستدن اللي مثل البطوط الهدافي
احمس وزينها على كيف ما اريد
بدلال ما عنهن سنا النار طافي
ودق النجر حسه يجيب الملابيد
يجلي نواد اللي من النوم غافي
تاتيك دقلات القروم الا واليد
ويكثر علينا قوكم والعوافي
ادغث لها حفنه من الهيل لا تزيد
والزعفران وروكه يا السنافي
وسقها لذربين الرجال الاجاويد
وصبه لمن يثني خلاف المقافي
اللي يروي حربته با المطاريد
لعيون من قرنه على المتن ضافي
بنت الشيوخ مخضبين البواليد
حريبهم لو هو بعيد يخافي
واثنه على اللي وان لفوه المعاويد
ريف النشامى والركاب الهجافي
يضحك حجاجه لا لفوه المسانيد
لا يا بعد خطو الكذوب الهلافي
وحنا ليا صرقع ضبيح البواريد
عدونا تسفي عليه السوافي
وان لبس المركب بريش الهداهيد
وصار المقامع دون حم الشعافي
ناخذ على جمع المعادي ملاكيد
ونمشي على وضح النقا با الكشافي
وان درهم الصابور ما من تصاديد
كم فارس صارت عظامه تلافي
مركاضنا يشبع به الضبع ويعيد
والنسر اللي بطنه من الجوع هافي
