ألا ليت الدروب اللي خذتني لك بكل أرضاي
تعدت بي بعيد هناك ما جابتني لبابك
عساها كل ما أقفت تنتحي بك ما تردك جاي
وعن دروبي تنحي خطوتك عني وتنحابك
وهواجيسك ليا حنت من اللهفة على لاماي
تلقاها الليال اللي عن أيامي تعدابك
أنا ماني قراحك يوم تظماني وتشحذ ماي
ما هو من قل لكن ريهجاني ما توصابك
مشاوير التوافق بين خطواتك ونوز أخطاي
ومسافات الفوارق بين مرقابي ومرقابك
عسى ما أنت العوض بأقصى محبيني ولا أنت أتلاي
وعسى ما أنت الرجاء في مقبل سنيني ولا أشقابك
أنا مبداي واضح وأنت ما أنت مغير مبداي
على هونك على العود الليان ونظرة إعجابك
لو تحاول حصوني ما وصلت أدناي دون أقصاي
وأنا لو أني أبحث في خفاك تكشر أنيابك
مشاريهك على يمنك لا تشره على يمناي
وإذا لك شي مد له الشليل من أعرض أثيابك
على هالناي غن الطرق يا اللي ما عرفت الناي
وأنا عندي يقين إن كان شلته يتعب ركابك
