من عاش بالدنيا يشوف العجايب
ما مر به من يوم يأخذ تجاريب
والمعرفه بين الخلايق وهايب
أحدٍ حدر وحدٍ تعلّى المراقيب
دنياك يالمخلوق فيها الغرايب
يا كثر ما تضحك وتخفي من الغيب
يا كثر ما تاعد وتنهب نهايب
لو كان نرضاه غصب بلا طيب
ندله مع الدنيا وننسى العقايب
نشوف زينتها وننسى العواقيب
بكره إلى حطت علينا النصايب
ننسى قرايبنا وننسى الأصاحيب
تفكروا ياهل القلوب اللبايب
الموت حق ولا عن الموت تجنيب
أغنم ربيع العمر قبل الذهايب
ترى الأجل مكتوب للعبد ومصيب
يقولها اللي لوّعته المصايب
لو هو صغير السن ما ناشه الشيب
