متى نصحى من الغفلة؟! متى نرسى على مرسى؟!
متى نحذر من الدنيا وهي بالحيل غدّارة؟!!
يموت الميت.. ونفزع ليالي بعدها ننسى!!
ونرجع مثل ما كنا بعد ما تنتهي الغارة!!
غريبه ما بعد خذنا من اللي قبلنا درسا
كأنّ الله خالقنا لكل الناس قبّارة!!
فكم من واحدٍ يصبح بخيرٍ مع هله ما امسى
واذا أمسى قبل ما يصبح طواه الموت باقداره
يلين الجامد القاسي.. وحنا قلوبنا تقسى!!
أجل وشلون لو كانت من اصل جبال وحجارة؟!!
عِبر في الكون.. في معنى كلام النظرة الخرسا
وفي البسمة.. وفي الدمعة.. خفايا الكون واسراره
بلادٍ ظامية حتى بها العود الخضر يبسا
وبلاد الغيث يسقيها.. ثراها تورق أشجاره
أشوف الحظ فالدنيا يجي عقب السعد نحسا
وموال الفرح لابد يومٍ تبكي أوتاره!!
نعم آمنت لو كانت لابن آدم مية نفسا
مصير الموت يرحل به عن الخلان ودياره
مزارع كلها الدنيا لنا وأعمالنا غرسا
وفي يوم الحصاد الكل منا يجني أثماره
