يسهى القلم بيدي وأنا ساهي فيك
إلى لمحت الليل غطى محياك
وإلا رفعته حزة اشراق بيديك
يسرق سنا نورك بصر من تحراك
يسهى القلم بحروف عيت تجاريك
وأنا سهيت بكل شوفي مع خطاك
ما هي غريبه يوم تقفي أناديك
الفاجعه قلبي الى اقفيت ناداك
أكبر خطاك قلوب بعته وتشريك
وأكبر خطا قلبي ولو بعت يفداك
عذروب وقتي حطني بين أياديك
يازين عذروبٍ رماني بيمناك
تروى عيوني شوف والقلب ظاميك
وإن مات قلبي ناظري ما تعداك
