|
القصيد احلاه ما يغري بك
زفرةٍ في صدرك تحاذرها
يستثيرك سحره ويسري بك
من بروق شجونك لماطرها
والذي يعذلك ما يدري بك
لين تاصل زفرتك.. لآخرها
من حبيب زان له تعذيبك
لا رحم دمعه ولا يعذرها
تفرح بسعده وهو يضحي بك
فرحتك ماتت وهو يناظرها
سال دمعك أو عوى بك ذيبك
كم حقيقه واضحه ننكرها
لو يصيبه همك اللي يصيبك
كان نفسه في العتب يقبرها
لكن الله عالمٍ في غيبك
لاتزيد الهم وتكبرها
عامله بالمثل يعرف طيبك
يرجع لأيامك يدورها
وان يوديك الوله ويجيبك
عاند اشواق الغلا واسترها
يا يجي مشتاق لك راضي بك
أو تموت العشرة وناكرها |
سلطان آل منيف | 
