الحمد للي دار الافلاك تدوير
لين الصفاري عاودت في شهوره
عمارنا يالله حسن التدابير
عندك تصير الخاتمات مغفوره
اقبل مع النسناس علم السوابير
شطر الحماد مفرّح اللي يزوره
العلم يالطاروح عجّل على السير
تدري عن الصقار يرقب سبوره
وجهه شمال ويلتفت يمت الخير
يم المغيب وصار يسبر طيوره
ينطر يجن مقطباتٍ مغاتير
ما تاوقت بالصيد شلفٍ نحوره
اللي خبرهن ماقع الطرح لاغير
طير الحماد وطير ضلعٍ نزوره
والا من الخبت المسمى ورى الحير
طير الجزيرة دوم نفسه جسوره
وإيران لا تفّل من اطيورها طير
الفارسي يا طيب فعله ودوره
وأوصيك بالشنغار وأيضاً السناجير
وحوران منها طيبات بذوره
أما طيورٍ للصقارة فهي غير
مع انها تدرج من الروس كوره
مير المدارج تختلف يا مناعير
واكيد ثابت للصقاره صقوره
ياما حلا وان جبت اشعل نواوير
افدغ كشف راسه كما النور نوره
ابيض نحر وامن القفى شعلة الكير
امشمحط العاتق وساعٍ نخوره
وعينه كما الراصود في فضّت البير
شاتر نشرها من عيونٍ بحوره
اجرد طويل اجناح واكراعه اقصير
متفهق المنكب وبارز بزوره
له منسرٍ وافي يسر النواظير
وله معلفٍ واسع وفخذٍ فتوره
اجلالٍ اكفوفه وحش توه اصغير
ما به من الدقة وصوف محقوره
يشوق بالمنظر جميع الصقاقير
والفعل للصقار تظهر اموره
العلم يالطاروح عجّل على السير
تدري عن الصقار يرقب سبوره
