قلوب الأوادم تختلف في توازنها
بعضها يلين وبعضها صلب مالاني
عسى الله يسامح نظرةٍ ياملا منها
تغيرت واهتزيت واختل ميزاني
أنا ماسلمت وصاحبي مادرى عنها
خويي على جنبي ولاجاه ما جاني
خلي الفؤاد يلومني ويتشاينها
وأنا ألوم نفسي يوم أخاويه يا اخواني
ما شده جمال ولافتنته مفاتنها
ولازان شي في عيونه ولا شاني
عيون المها قفت وعيني تعاينها
ورى عاذلي ما صد عني وخلاني
مادام إنها في عيني الله مزينها
فداها فداها نزف قلبي وشرياني
عسى الله يعيد الصدفة اللي محاسنها
تغطي على سيّاتها قبل تنساني
وأنا يمها بعض الفرص ما تحينها
ولا احطها لحظة براسي وحسباني
حياها وحشمة من وراها تحصنها
عن اللي يبي يخطر على بال شيطاني
عن العيب والمنقود والزلة أضمنها
وعن هرجة القاصي من الناس والداني
حقيقة شعوري يمها ما أقدر اعلنها
وهي غامضة والسر مازال يخفاني
وحقيقة مشاعرها عجزت اتبينها
لعل الغموض يزول ويزول حرماني
