ارحل وأسافر بالليال المغابيش
بارض خلا ما دوجت فيها الادباش
وأخيل براق المزون المراهيش
وعيني على نوّ الحيا ترمش ارماش
مع جرهدٍ ما فيه حتى الخفافيش
جيته وانا كنّي عن الخلق منحاش
والا سواة اللي تنحا به الطيش
حيله ضعيف وراح يومي به الطاش
لا تسألوني عن سبب رحلتي ليش
يمكن تجي عبر الصحافة والافلاش
لو ابا أعد اللي جرى لي قدّيش
نوبٍ بشمس ونوب في ظل وافراش
والله واللي نزل الرزق والعيش
اللي فلولا رحمته ما حدٍ عاش
اني سعيدٍ لو ما في يدي ايش
دامي بهالدنيا مسافر وطراش
والناس مثلي كلبوهم طراريش
وكلٍ يخلي ما بدنيا الفنا حاش
ما مات طيرٍ بالفضا يخفق الريش
وبيته على سفح الجبل ليف واعشاش
بس اني اطمع في فعول المداغيش
وعن الوفا ماني مضيع ومنداش
عجزت لاجمع في يديني محاويش
واصبحت انا مع هالزمن طق واهواش
حاولت اجي من عرض ناسٍ قراريش
وعيّا يناسبني وضع شخص قراش
