ليش يا صبري تململ ما خبرت انك.. ملول
ليش ما هي عادةٍ لك لو جرى مهما جرى
خابرك لو حاولوا بك ما تضيق ابك السهول
صدرك أوسع من تفاكير المشيّب للورى
ليش قلّي لا تردد وش حصل لك لا تقول
اذهلوني في زماني لين حاربت الكرى
ثمّة انصاف الرجال اللي تزايد في ذهول
مظهرٍ خادع وبارع في تصاوير الهُرى
لو يقول الراس وينه ما على متنك حمول
شلتها يدينك على راسك تحسّس ما جرى
وبعضهم لو يتبين صار مثل اخته خجول
ما يواجه وان تخفى عنك باعك واشترى
خابرك ياذخر عمري لاضعيف ولا زعول
مايهزّك لو تجيك اكبر من طويق وكرا
ليش أحسّ انك تردّى من نحولٍ في نحول
الجبل مهما يصادف من عوامل مادرى
ادري انك في زمان ما اقدر اقول معلول
حكمة الله يرتضيها كل من فوق الثرى
وادري انك في مصادم بين طايش ومهبول
ما يفرّق في حياته بين أبيض واسمرا
صبري له قصّه طويله وينكم يا هل الحلول
يالحميدي حطّها وسط الجريدة تنقرا
ليتهم يا بوحمد ياتون بالحل العجول
ويا تُرى من يجلب حلول الوسط لي. يا تُرى
يوم صبري من زمانه قام يشعب له ذلول
منذ هل في كل حاله لاطراله.. ما طرى
