يا عاشقين المرجله والشكاله
المرجله ما هيب وصف وتمثيل
كل المراجل ما تجي بالسهاله
ودروبها فيها العنا والتهاويل
تبغى طموح ما يوني نضاله
حلحيل ما تقبي عليه المحابيل
المرجله صبر الفتى واحتماله
لاجات منها في النظر والدعاويل
والمرجله كد ومد وقاله
وتخسر اللي يجمعون المحاصيل
والمرجله حمل ثقيل مشاله
تبغى معيد ينهض الحمل ويشيل
لو كان من جا كايد الحمل شاله
ما كان في ذا الناس فرق وتنافيل
خطو الولد بدر ترقب هلاله
وعلمك بنور البدر يا ساري الليل
البدر يسفر في الظلام اشتعاله
وفي نور هديه يهتدون الدواليل
وخطو الولد ديم حقوق خياله
ومع نوض برقه يكثرون المحاويل
وخطو الولد يعجبك نظرة خياله
اجمل من الخفرات واقوى من الفيل
مغفل ماداهم الهم باله
وعزي لمن هو نجدته لا ونى الحيل
