طوّح سبوقه وانتهض وادرج الحوم
وآطيري اللي عقب النجم يا عم
أصيح (يا محمد).. وأنا أطيح واقوم
والله يبيحه راح ما قال لي.. تم
سبقت طيرك بالهَددَ وانت محشوم
كذا الحرار تموت ياللي تبي العلم
للوكر تلويحة شياهين ورجوم
وللصدر صرخة موجعٍ مالقت فَمْ
قفّى.. وأنا وجلٍ حزينٍ ومكلوم
والقلب ما هو للفراق امتولمّ
وعيني مخاشر دمعها قِلّة النوم
واقصى معاليق الحنايا تَرَزّم
والشعر أبيه ولا .. يجي، جعله القوم
من عقب أبو خالد قصيدي تيتّم
من فايت الجمعه وأنا تقل منجوم
أربع عشر ليله وأنا مونس الهم
هو مات كسّاب السنا روحي التوم؟!
راعي هلا.. مرحباً وأبشر وسَمْ!!
وراعي علومٍ تطلق الوجه وسلوم
نبكي عليه ونذكره وانتبسم
كريم طبع.. سراج ربَع.. أفتل عزوم
عَشّاق رفع حجاج أبوه.. ورِضي أم
عزّاه يا محمد.. سند كل مضيوم
رحماك يا مجري السفاين مع اليَمْ
لو شفت كيف عيال عمّك هاكَ اليوم
وقَّاف .. وجموع المعزيّن تِلّتَمْ
صبح العزا والقصر بالناس مزحوم
والفقد كايد.. والحضور امتجهّم
يالله عساه بجنّة الخلد مرحوم
ويالله تنورّ له بقبره اليا أظلم
يالله زبنتك لا اعتراضٍ ولا لوم
يا فارج الكُربه ويا جالي الغم
عزّ الله إنه غيّب الموت زيزوم
وعزّ الله إني فاقدٍ لي ولد عم
