الله أكبر يا تصاريف الأزمان
ساقتني الدنيا على كل ميله
مكتوب أعيش الحب وأموت كتمان
ولا لي على صرف المقادير حيله
كنت أحسب أن الحب روض وبستان
أجني زهور الحب من أحلى خميله
وغزيت قلبي في هوى الغيد نيشان
وصابه من الخفرات ضافي الجديله
وزلّت بي الأقدام يوم الهوى حان
ومشيت درب الحب سنينٍ طويله
اسمه هوى ويضيع في كف ميزان
وعند الحقايق يهلك النفس شيله
وهذا الهوى لا حان راع الهوى هان
مكسور خاطر والنواظر ذليله
وأخفيت سري عن غثا فلان وفلان
وبعض البشر بالسر ما ينحكي له
وشكيت له من لوعة الوجد ولهان
وشفت الغدر من صاحبٍ شكوتي له
شفت الغدر بالعين يوم الزمن شان
وضاعت سنين الحب في ظرف ليله
وطويتها بالقلب جمرٍ ونيران
يا كثرها بالحيل لو هي قليله
وكتبت بجدار الهوى :' كنت غلطان'
وكان الندم ينفع .. أبتبع سبيله
وقتٍ مضى عفته ولاني بشفقان
واللي لقى غيري.. أبلقى بديله
