أنفلونزا الطيور

يقول الخبر: (منذ ديسمبر الماضي حدثت أنفلونزا الطيور في 10 دول ومناطق بآسيا مما أدى إلىهلاك عشرات الملايين من الدجاج بسبب المرض أو عن طريق الذبح وتم ذبح مليون ونصف المليون دجاجة خلال3 أيام).
من قريت هالخبر رحت على طول لدحيم ولد جيراننا وعلمته وبدون ما يتفاهم قام من الروعة وراح لعشة الدجاج اللي بمزرعتهم وقبس فيها بدون رحمة لين غدن هالدجاج الضعيفات سود محترقات وحده منهن قدرت تنحاش وريشها مولع لكن ما لحقت للأسف وافتها المنية.
عقبها قاموا أهل الحارة كلهم يقلدون الوضع المأساوي اللي نطل دجاجة من السطح واللي حطهن بكرتون وراح بهن لمكان مجهول وكل يوم ما غير نسمع البقبقة والمطاردات الملتهبة.. على كذا أكيد بترتفع أسعار الشوايات وبهارات الدجاج ولاتهون الشكشوكة اللي بتنافس سعر الكبدة.. من جهتي بصراحة ما أشوف ان الدجاج سبب مقنع لهالمرض الانفلونزي الله يبعده عنا واعتبرهن ضحية وما منهن شر ليش ما تسلطوا على البعوض اللي قاعد يلاحقنا ويشرب من دمنا كل يوم وخاصة هالايام اللي شان حملته بكل قوة وصايل علينا بكل مكان ليش ما يشنون حملة للقضاء عليه دامه يسرح ويمرح في يدينا ورجولنا حتى خدودنا اللي ما نصحا من النوم إلا وهي تعكس شفق الغروب.
لاتشرهون عليّ صدقوني أكتب لكم هالموضوع وعندي بعوضتنْ ذابحتني في عمري.. يعني الواحد قاعد في أمان الله ويكتب وهالباعوض حاط حيله ومشغل الماطور ويشفط من كثر دمي هالحين يوم انه طاق بير ارتواز في رجلي؟ واللي فاقع مرارتي ماله صوت أبد شكله حاطه على الصامت!