أبدأ بذكر اللي رفع سبع الاطباق
ربٍ كريم وفي ضمانه ضمنا
الواحد المعبود قسام الارزاق
عليه في كل الامور اتكلنا
من يلتزم بامره فلا هوب منعاق
في خيره وعطفه ولطفه شملنا
يالله عسى في ما ومر فيه ننساق
ويا جعلنا نخلص لوجهه عملنا
دنياً تدور وساعة الموت تنذاق
وحنا بدنيانا نطوّل املنا
راح العزيز اللي على الخير سبّاق
قبل نهار العيد علمه وصلنا
موقف عسير وصعب ماهوب ينطاق
جانا خبر موته وموته ذهلنا
هذي فجيعه من سببها الفضا ضاق
فجيعةٍ من كبرها ما احتملنا
ذي دبرة اللي للمخاليق خلاق
نرضى بها وبكل الامر امتثلنا
يبقى الدعاء للي مكمّل بالاخلاق
اللي بحب الخير مضرب مثلنا
ندعي لابو صالح ومن كل الاعماق
جعله بلذات الجنان يتهنا
جنات عدن اللي بها كل ما لاق
ينزل بها في رحمة اللي كفلنا
وصلاة ربي عد ما لاح براق
على نبيٍ زاح عنا جهلنا
