أكبر قضية ما عرفنا لها أسباب
حيث إنَّها شيء دخيلٍ علينا
ما قد عرفنا شيء سموه إرهاب
لين طلعت ناسٍ هدفها تهينا
ناسٍ رضت تبقى مع الغير اذناب
بقلوبها شر وحقدٍ دفينا
الانتماء لدينها للأسف غاب
وقلوبهم مثل الحجر ما تلينا
وحب الوطن بإحساسهم كان كذاب
أفعالهم أكبر دليلٍ يدينا
يا للأسف ما خافوا حساب وعقاب
ظنوا تطرفهم بعلم ويقينا
ما خافوا من اللي له العبد طلاب
ما كنهم في يوم له ساجدينا
نسو الشريعة عندنا بس بكتاب
وبسنةٍ نمشي لها طائعينا
ما عندنا تحريف وأقوال مرتاب
رأي الجماعة نور وسط الجبينا
من فعلهم قلبي من الهم منصاب
خسروا مبادئهم بدنيا ودينا
ومن هالسبب والله جرحي فلا طاب
شفنا الأذى من ناس منا وفينا
عمر الوطن ما كان بس أرض وتراب
هذا الوطن إحساس منه انتمينا
حب الوطن ما ينقص ببعد وغياب
بالعكس بالغربة نبيه ويبينا
سلامتك يا أرض المحبة والأحباب
يا اللي جمعتينا بحب وحنينا
تفداك روحٍ حطتك عين وأهداب
حبك لها تاجٍ بمد السنينا
صحيح نفتح للكرم دار وأبواب
ما قد تعذرنا ولا قد شكينا
لكن يا ويله من به القلب يرتاب
أو غرته نفسه وفكر يجينا
في شرعنا ما نعرف أغراب وأقراب
ننهي حياة اللي تآمر علينا
أصغر خطاه إن الأمل فيه قد خاب
وأكبر خطأ ظنه بيقصر يدينا
ما ينثني عزم السعودي بالإرهاب
وإن اثبتوا شر بخيرٍ نفينا
