طال صمت الشاعرة والشعر كَفّي
والمشاعر غير صوته ما كفاها
كل ما دار الوزن.. بالقاف لَفّي
والمعاني كل وزنٍ ما شفاها
يا ترى؟ نهر القصيد اليوم جَفّي
أو ترى هَجْسْ الشعر غصبٍ جفاها
لا تلوم الشاعرة.. لو ما يِرِفّي
طير عَذْبات الفرايد في سماها
ولا تلوم الشاعرة.. لو هي تِعِفّي
جرح (وجدان الوطن) كَدَّر صفاها
شاب فكري من شبابٍ مستخِفّي
في ميادين (اللهو) نفسه رماها
سطحي التفكير!.. وقته ما يكَفّي
مع سخافاتِ تسابَقْ في فضاها
يحترق بالنار.. ويحسبها تِدَفّي
ميِّت الاحساس.. ما يدرك مداها
أو شبابِ من ورى الدِّين مْتَخَفّي
مشغلِ دنياه.. صبحِ مع مساها
شاربِ علْمه من افكارِ تِزِفّي
للمهالك!! من قراها.. وارتضاها
مع طوابير (الغلو) بالدين.. صَفّي
صار (بالتكفير) و(القتل).. يتباهى
يا شبابٍ في دروب الشّر.. هَفّي
لا يطول بْكْ المقام.. انهضْ معاها
ذي بلادك.. خايَلَتْ بك كل شَفّي
أنت حلمٍ.. راهَنَتْ بك من غلاها
من خلقنا الله.. وحنّا نستشِفّي
(منهج التوحيد) صافي في ذراها
وَفّ دين (المملكة) عليك.. وَفّي
محتضِنْكْ امانها ويا وفاها
صافَحَتْك الشاعرة.. والشعر كَفّي
مِدّ كَفّكْ يا لسعودي.. في بناها
طَفْ نيران الفتن.. بالله طَفّي
وانتصرْ لارض الحرم واخذِلْ عْداها
