قال منهو لا هرج جاب من جزل القصيد
القوافي صنعته في حضور الغانمين
في العصر غنت حمامة على خوص الجريد
صوتها حرك مشاعر قلوب الدالهين
ذكرتني يا حسن ما مضى ليته يعيد
جعل يسقى يا حسن يوم حنا جاهلين
كل ما هب الهوا راح تفكيري بعيد
راح يذكر ما مضى في قديمات السنين
يا وجودي وجد منهو على الدنيا وحيد
عقب فرقا لابته صار في داره حزين
انتهى عصر الصبا وابتدا همي يزيد
اختفى نور القمر والفجر عيا يبين
مات ابوي وعفت شوف الوطن عقب الفقيد
مثل شبل عقب موت الأسد عاف العرين
يا عذابي كل ما شفت مدهال جديد
صاب قلبي من عذابي تنهّات وونين
مل قلب كل ما قلت له عيا يهيد
راسخ فيه الحزن مثل نقش الراسمين
يا الهي روف بي طالبك عمر سعيد
يا الهي طالبك يا مجيب السائلين
