البارحة لاعاد ليلٍ سهرته
طال وطوى قلبي وطوّل عذابي
حاولت أبقهر هاجسي ما قهرته
في ليلةٍ يا حسين همي سرابي
شي جرالي بالقلم ما حصرته
مع هاجس الذكرى زماني غدابي
يا ليت والله ساعةٍ ما ذكرته
يا ليت ما جددت ذكرى مصابي
حكم الولي والا أنا ما هجرته
ودي بقربه لو عذابه سطابي
أنا على فرقاه ياما عذرته
معذور حتى لو يطول الغيابي
أنا بعذب الشعر ياما شهرته
أكتب وأجدد ما مضى من صوابي
قصر الغلا لأجلك بقلبي عمرته
وشيدت لك قصرٍ تعدّى السحابي
ياللي ببعدك كل شي حضرته
وأخاف تصبح من سبايب ذهابي
حتى الدموع اللي ببعدك نثرته
كانت عزيزة ما تمس الترابي
هذا شعور الشعر لك ما عسرته
كانت بداية شوف وين انتهابي
اللي جرالي بالقصيد اختصرته
في ليل طال وزادني بالعذابي
