البسمله والفاتحه والتحيات
نور الكلام وريح عطره ولوله
فيها لمشغوف المواهب ملذات
ان صابته عين الزمان الختوله
من غيرها ما شفق على شرد الأبيات
ولأسر جلها خيل الخيال وزلوله
عنها انتحى من ضيقه الصدر بسكات
مع هاجس منه الخواطر ملوله
أقفي ليا راحت واجي كأنها جات
في غربة منها النفوس معزوله
كن الفكر كوكب يلف المجرات
والصدر تلعبه سنين الطفوله
يا زين أهازيج الأغاني والأصوات
لا عانقت ضحك الوجيه الخجوله
من بين حيين الضماير والاموات
فأغلى زمن فالعمر وأطيب فصوله
ربيع وسم وفيه للشعب زفرات
تشبع ذلول الوقت فيه معقوله
للنبت في روضه عطور وحلاوات
كن أطيب الأرياح منه معموله
حوذانه يقول لعليله سلامات
اليا طرق له رمش عين كسوله
معه النظر يسرح ويضرب متاهات
ويقبل على روض الخزاما قبوله
في وسط ريضانه من الورد باقات
عبيرها نفح البنفسج فضوله
من كثر ما جاها من المزن واحات
فا الوسم الأول والأخير معلوله
يلقى بها شاكي زمانه وناسات
مع ريشه الرسام ينسى عذوله
صوره خيالية من الحسن والذات
الريح فاخر والشفاه معسوله
للضحك عقب الهم فيها مساحات
لين النفوس تروح منه مغسوله
في وجه من عزه بديع السموات
هباه عز فوق محدن يطوله
مشرفه ربي من الخلق بالذات
بتطوير بيت الله ومسجد رسوله
منصب شرف للي يرام البطولات
ما صار في التاريخ عرضه وطوله
حلم الملوك أهل الحصون المنيعات
لا سلطن التوحيد غيض الرجوله
له ارتكي يوم الضوامي محيمات
فالحج الأكبر والحجيج أشهدوله
واشتالها فوق الكتوف العريضات
ودّه يخبر نجد منهم زحوله
في حاضر أيام الليالي وما فات
لين الزمن للي تجاهل يقوله
يبي بها من عند مولاه حسنات
عن عالم سمر النوايا تجوله
من راس أبو تركي وصوفه كثيرات
حلال عقد اللي تلاشت حلوله
مخاشره كل الوصوف العظيمات
حتى المثول لطاعه الله مثوله
هذاك أبو منصور رمز المروات
فالطيب مثل سهيل محدن بحوله
عسى سنين أيام عمره طويلات
وجعل الليالي ما تقفي بزوله
أمقابله طب القلوب العليلات
نور يشق الليل لأضفى سدوله
أجيه وأهمومي مجاميع وأفوات
واليا سريت تقول مسئول دوله
يا سيّدي لو فيك هيجنت الأبيات
عن مدحك أفكاري تعوّد خجوله
صحيح لو كثرت عليك المهمات
ما للصعاب الا رجال البطوله
وأنته لها يا تاج رأسي ليا جات
لك في طريق المجد صوله وجوله
وأختامها مني سلام وتحيات
بالورد وأنواع العطور معموله
