عسى الله يعز الدين وبلاد اخو نوره
يدوم الامن والخير يزها مبانيها
ترفرف عليها راية الدين منصوره
تحت حكم أبو فيصل ويخسر معاديها
ملوك الوطن دون الوطن درعه وسوره
ليا لجلج البارود والعج غاطيها
لا هانت بلاد الفهد وتدوم مسروره
ولا هانت ملوك كبار هقاويها
لياشفت جيش الفهد ثم شفت طابوره
تسيل الدموع من الفرح ما اقدر اخفيها
بلادي حماك الله وبالخير مذكوره
على ترابها خمس الصلوات نديها
نرتل كتاب الله ونقرابه السوره
بلاد النبوة يا عسى الله يحميها
وطنا عزيز ولا دعى كلنا اصقوره
عيون العدا دون الوطن دوم نعميها
وحق الوطن واجب وكل بمقدوره
من أجله نبيع الروح وبالدم نشريها
نشوف العداء في تالي الوقت مقهوره
على أرض الوطن تنشر وترمي بلاويها
ضعاف النفوس اللي على الشر ماموره
شياطين تامرها وشياطين تغويها
نفوس العداء بالغيظ والحقد محشوره
على شاشة التلفاز تنشر دعاويها
ترى فعلكم جبان وفي بصمتك عوره
تجيب القنابل من ورا السور ترميها
ومن يقتل المسلم له النار مسعوره
ينادون يا مالك وقال اخسئو فيها
تشوف الجماجم تحت الأقدام منثوره
حرار الوطن يا لاش ما انته بقاويها
نبا نشف روسٍ فالقا كنها الكوره
بحكم الشرع من فوق الأمتان نرخيها
ترا خطة العدوان تكشف ومعثوره
وترجع على الملعون واللي مسويها
يبا يرغي النازي ويبرك على زوره
وتلعن طريق أهل الفتن يوم يمشيها
نصيحة تتوب وسيدي تأخذ بشوره
تجنب هل الفتنة وعلّم براعيها
ومن تاب يسلم من عنا ذنبه وجوره
ويبقى عزيز وفالوطن ضمن أهاليها
رجال الأمن هم شمعة الدار وزهوره
وبلاد بدون رجال تظلم لياليها
ترى واجبك يلزمك نحو الوطن دوره
تدافع بحزم وعزم بالدم تفديها
وعسى الله يدوم الامن والدار معموره
بوجود الفهد دوم وهل الشر يفنيها
