ما زالت الدنيا بها خير وافراج
من شفت ناس باللوازم قويه
اسرارهم مثل البحر تحت الامواج
غرايب ماله حدود خفيه
بقلوبهم رحمه وابيض من العاج
وانفوسهم سمحه وجيه بريه
ومنهم ابوخالد مثل وصف هداج
اللي ذكر بآخر كلامه خويه
يعطيه ما يطلب اليا جاه محتاج
يسوق من ماله ونفسه رضيه
ما قلت ذا عله وسبب لي احراج
هذا سلف وان راح تحسب هديه
كم واحد بأسبابكم شاف مخراج
لا شاف وجهك شاف حل القضيه
يفداك من سكر على المال مزلاج
ويفداك من يبخل ونفسه رديه
ماضيك بالتعليم تحصيل وانتاج
سيرة شرف نلته بحزم ونقيه
يشهد على فعلك طوابير وافواج
واخترت للصعبات اجود مطيه
بذلت مجهودك وخطيت منهاج
واللي مشا ممشاك لا واهنيه
يا شوق غرو صافي الخد مغناج
تزهاك يابن حسين بنت حليه
تدخل عليها بالمسرات وابهاج
تستاهله يالقرم لجلك جزيه
تقطف ثمرها فوق مخمل وديباج
واختامها مني عليكم تحيه
وصلوا على منهو عرج به بمعراج
راع الشفاعه يوم عرض البريه
