حاولت اعالج مرض معدي وفتاك
ما هو مرض سارس لكنه وليفه
ما اشوفه الا مع اللي ماله ادراك
مبلي ويبلى به انفوس ضعيفه
يضيع من سيرته هذا وهذاك
ويتهم رجال مواقفها شريفه
الى تكلم بشين الهرج يبلاك
يمشي وعينه عن اليمه كفيفه
ان قلت مخطي بليا شك خطّاك
وان قلت صايب تبين لك غريفه
الى نصحته عديم الراي ينهاك
كثر المكابر بدنيانا حليفه
مار انتبه له ولو يبحث عن ارضاك
ترى علومه عواقبها مخيفه
خالف طريق مشابه ووزن اخطاك
واحذر يماشيك مخلوق وصيفه
اسلك طريق يعزك عند مولاك
اعمالك مسجلاتٍ بالصحيفه
ان كانها خير تلقى الخير يمناك
ما دامك مقدم اعمالٍ نضيفه
وان كانها شر قدمته بدنياك
ابشر بحسرات واهوالٍ كليفه
ما فيه حي يبي ينقل خطاياك
النار لاهل الموازين الخفيفه
يا الله يارب يا رحمن بحماك
تنجي عبادك من اهوالٍ عنيفه
تجعل لنا الجنة بلطفك ورحماك
هذا رجانا ودنيانا كسيفه
