على وضح النقا ردٍ على الباغين والحساد
أقول الشعب حول قيادته يلتف ويفادي
ترى آل السعود قادتنا قصر طول الزمان أو زاد
ولا نقبل سواهم لو يجي عنتر وشدادي
بلدنا من فضل ربي فلا مثله يعيش بلاد
ملوكه حكّموا شرع الكريم وسنة الهادي
بلاد الخير وأهل الخير والتاريخ والأمجاد
حموها وأكرموها في سيوفٍ حدب وحدادي
زمانٍ به لميعٍ للسيوف وللخيول أطراد
على الخيل السروج وللركايب خرج واشدادي
يحثون الخطاء والسير بالمصباح والمهجاد
يمر الليل ويبين الصباح ولا به رقادي
أسولف عن تواريخٍ قديمة واخبر النشاد
تراها عشقةٍ جت في نهارٍ صلف وعنادي
وبعد سادوا عليها الخير في كل النواحي ساد
سعودية تعيش من الرخا في خير وسعادي
قيادتنا حكيمة وافية من خيرة القياد
رعوا حق المواطن وابعدوا حزات الأنكادي
يعيش بخير وحقوقه تجيه بخاطرٍ منقاد
هذا حكم العدالة وأخبروا به كل نشادي
حقوق الدين والإسلام هم اللي لها روّاد
كلامٍ له ثبوت ويثبته مصدر وميرادي
عجب من يستمع في شلة التخريب والإفساد
أقول لمن سمعهم وانخدع لكذابهم غادي
يهودٍ ما تعرف الله نصدق ليش يا الأجواد
يكنون الحسد للمجتمع وأنواع الأحقادي
خوارج والخوارج ما لهم في صفنا مقعاد
ترى المفروض ناقف ضدهم في كل مرصادي
دعاة الدين حنا كيف نسمع من دعاة إلحاد
اتصرفهم يهودٍ مثلهم وأحزاب وأوغادي
بعيد الدين عن منهج عبادٍ يعبدون عباد
تسموا بسم دين الله وهم للغير عبادي
عسى الله يحفظ اللي في نهار المعضلات إسناد
حمات البيت واللي داخله ركع وسجادي
ترى حب الوطن وأهله من الايمان والارشاد
وانا حبه وحب أهله خليط الشرب والزادي
أحبه حب صادق وارثٍ حبه من الأجداد
وصايا من وصايا والدي ووراثة أجدادي
جدودي مع معزي جاهدوا يوم الجهاد جهاد
زمانٍ لا خبر تلفاز فيه ولا خبر رادي
ما غير الشلف مثل البرق والبندق كما الرّعاد
رجالٍ في نهار الكون بالأعمار زهادي
يديهم مع يده في حزت المصدار والميراد
يبي يشهد لهم صم الحجر والضلع والوادي
وانا حاضر فدايا للوطن بالمال والأولاد
وعد مني وبافي بالوعد في وقت ميعادي
وانا حربي وحرب أهل الوفاء ما تخلف الميعاد
تسوق أعمارها دون الوطن وأفلاذ الأكبادي
"مدارات شعبية"