يا دار اخو نورة فداك أمي وأبي
وأولادي فدا لك وروحي لك فدا
عهد وعيته قبل لا يخط اشنبي
ما هو بعهد اللي ليا دور غدا
يغذى عليه الطفل قدام يحبي
من طيبنا واللي قديمات أجددا
نعيش فوقك عيشة الحر الأبي
وإلا نموت وموتنا يزعل عدا
شاهت وجيه أهل الخيانة وتهبي
عن نورك الدري بل تبت يدا
اللي يمد يديه ليدين أجنبي
يلعب به الغربي كذا ضيعة جدا
ما يدري إن الرد يعبأ له عبي
ومن لا عرف في طيب يعرف في ردا
أنا اشهد إن اللي يبي عرشك غبي
وفيك أهل العوجاء تلبي وتحدا
"مدارات شعبية"