يابن البلد كانك صحيح ولدها
احفظ حقوق الوالدين الحشامي
يابن البلد حاول تجنب نكدها
ارفع مقامك يا رفيع المقامي
يابن البلد حاول توفر سعدها
عليك بالعليا وراس السنامي
يابن البلد مالك مصيرٍ بعدها
هي ربّتك حتى لبست الحزامي
هي فادتك من خيرها وانت فِدها
حاول ترد الها الجزاء بحترامي
لا خير في يمنى تخون بجسدها
ولا خير باسمٍ ما يعز الاسامي
يابن الحمولة لا تخون بعددها
لا عدو أسماهم قفوك بملامي
لا تعاهد أمك ثم تخون بعهدها
يومي بك الشيطان شرقٍ وشامي
تصبح بدارٍ شيل منها عمدها
دار هدام ومبتليها هدامي
تزرع لنفسك مشكلة وتحصدها
والعاقبة ما هيب برد وسلامي
مثل الذي داوى العيون برمدها
وأسهر عيونه عقب حلو المنامي
أو مثل من لذة حياته فقدها
لا شفت جسمه جلد فوق العظامي
مقرود والنفس البريه قردها
خلا الحلال وراح يم الحرامي
عزي لبوه ولمه اللي جهدها
راحت هقاويهم سوات الحلامي
يابن الحموله خلك أنته سندها
ملجاً لمنهو عض راس البهامي
حتى تقاودلك ويسهل قودها
مثل العسيف اللي عصاها الخطامي
ذي نعمة ياجب عليك تحمدها
أد الزكاة وصل واقض الصيامي
وعوايد الجدان لا تنتقدها
اعمل بها ولا تعكس النظامي
وعن ما يريبك عز نفسك وزدها
وابعد وخل النور يجلى الظلامي
وانسى الطروق الضيقه وابتعدها
وامش الطروق اللي بها ما تلامي
وعسى السلامه ترتكيلك بيدها
وتحط لك ذوب العسل باليدامي
"مدارات شعبية"