حتى ايش لو قامت الأحداث تكربنا
حنّا لا شان الزمان نزيّن اطباعه
الموقف الصعب ما يدقم شواربنا
ولا يثني عزومنا لو كثرت اوجاعه
تشهد لنا الخلق والواقع يقرّ ابنا
عاداتنا اللي يميل نعدّل أوضاعه
ما نغفل اعن الأعادي لين تزربنا
صاحين لنمور سود الغاب وسباعه
ولا ننقل الكذب لو هو حيل يطربنا
الصدق منهاجنا والمجد صنّاعه
إلى زعلنا عطيباتٍ مضاربنا
وإلى رضينا عطانا وافيٍ صاعه
انه مثير الفتن يجهل ويقربنا
والله والله ما يطمع بمرجاعه
والمذهب الحنبلي ما هو معذربنا
نهج النبي والصحابه نرفع شراعه
لا يحسب الحاقد أقواله تضرّ ابنا
والله ليعجز وهو ما حقق أطماعه
على العدل ديننا الإسلام درّبنا
الظلم معقولةٍ رجليه وذراعه
نمشي على الحق ونصفي مشاربنا
أفعالنا البيض فيها الخير بأنواعه
نعرف دروب الرجولة ما تخربنا
مظاهر العصر يوم الغير تبّاعه
يلقى جميع الحقايق من يجربنا
حضّار عند اللزوم ودوم فزاعه
نمجّد السلم ونحارب محاربنا
ونعسّس العز ونربّع بمرباعه
بالصبر والتضحيه ناصل مآربنا
ونحمل لحكّامنا السمع والطاعه
"مدارات شعبية"