يا خالتي دمعي على الخد سال
والقلب عند مفارقك زاد صاليه
بعد الحبيبة زاد حزنك وبالي
وشكواي للي كل الأكوان ترجيه
يا ما فقدنا من حبيب وغالي
وياما كتمنا الدمع والعين تبديه
قالوا بكيت وقلت ماني لحالي
كم واحد يبكي على فقد غاليه
أم وخالة سابقات الليالي
حنانهن لي طفل ماني بناسيه
أم وخالة بينهنه دلالي
هذي سعد ترضع وهذي تربيه
أم وخالة كاملات الخصال
بنات سعد والنعم عند طاريه
عسى منازلهن بدار العلالي
دار بها الرحمن شيد مبانيه
ويجمعهن الله في جنان وظلال
والكل منهن من جنى عدن تجنيه
سلام يا خالة اعداد الرمال
واعداد ما هل المطر من مناشيه
واعداد من حلوا بهاك الجبال
ووردوا على زمزم وشربوا لصافيه
رحتي وخلفتي علوم اجزال
جزل الثنا كل يقوله ويثنيه
وبكى لفقدك من قريب موالي
وبكى لفقدك كل منهو عرفتيه
والكل يدعو لك إذا جا مجال
ويذكرك خير الذكر فيما عملتيه
غبتي وزولك باقي في خيال
زولك نهار وليل ماني بناسيه
وبك العوض في طيبين العيال
ويبقى الوصل ما بينا ما غرستيه
يا عل قبرك وسط هاك السهال
لك روضة خضراء بمد البصر فيه
بضفة حنيفة جعل وبل الخيال
يسقى غروس به ويسقى مفاليه
وعسى شرابك سلسبيل زلالي
وما قد طلبتي من إلهك تناليه
"الرأي"