ياللي بفقهكم فقيه بقناته
عقولكم تحتاج بالفعل تفقيه
خوذوا حديث المصطفى من رواته
لا تاخذون من المسافيه توجيه
الدين كله خير وابرز صفاته
المسلم اللي رب جبريل هاديه
تلقاه بالمسجد يواصل صلاته
يقرأ الكتاب وكل فرض يصليه
ولا تيتم الأطفال متفجراته
ولا يرافق اللي يستغره ويغويه
وماله بطيبة نفس يدفع زكاته
وامن البلاد الآمنة يعتني فيه
وان كان عندك غير هالعلم هاته
ما هو رياء من صافي جاب صافيه
ما تفيد لا فات الفوات الشماته
افطن لعلمي لا تفوتك معانيه
علم بدويٍ عز راسه غناته
لكن عقله ما يبيعه ويشريه
فقيه في لندن مطرب حياته
وانتم على الرادوا تقولون لبيه
والخبز ما اعطاكم بقايا فتاته
لا تفتحون افواهكم يا مسافيه
ويمكن لامِس العلم يعلن براته
وتروح قصتكم ملام ومشاريه
واللي يبي منكم يسوي سواته
يرفع ايديه اجهار لا يخفي ايديه
ويشغل الرادو بحضرة خواته
واطفال صاب عقولهم شبه تشويه
سممهم المسموم بمهاتراته
واضحوا ضحية من تسمع لرادية
يا جاهلين احكايته وش حكاته
عقولكم تحتاج بالفعل تنبيه
امنول قولة سعودي مناته
والا، هذاك، اليازهمته تكفيه
عقب الدجاج اللي يجمّع شتاته
اليوم كبرت بالجزيره هقاويه
يبي ركوب الريل والريل فاته
اقفوا به اللي مادرو عن دواديه
كلبٍ نبح مواتر طايفاته
ما فاز حتى بالثقه عند راعيه
شمس الفقيه اقفت وكسرت مراته
نظارته عقب النظر ما تقديه
واللي يخفي سيته بحسناته
ويحط في هذي لهاذيك تمويه
سود الليالي بيّنن خافياته
ما عاد فيها، ليه، وش صار، وش فيه
يا للاسف لو ضاعت مبرراته
وتكشفت لاهل البصاير مغازيه
منا وفينا عقول مسترحلاته
يبدي لهم ظاهر ويخفي بلاويه
عدو الامه ماسرن سارياته
الا عليكم يا اهل البغي والتيه
اللي ورى الارهاب ومخططاته
نفّذ بكم تكتيكه اللي يخفيه
صرتم وسيله نال فيها مناته
ارباك الامن وقتل الاطفال ترفيه
الضعف فيكم وافق اللي بذاته
لكن سؤال ابي جوابٍ يجاريه
كان الصواب عقولكم مدركاته
تفكروا، تمعنوا، وابتدوا فيه
كلامه اللي خط بمذكراته
هو ليه ما يبدي بنفسه يسويه
يرخص حياته يستلذ ابمماته
ياخذ ثمنها قنبله في مخابيه
ارهابي التفكير من جاه شاته
لين انه اصبح ما يقدي مواطيه
ما يدري ان الدين حنا حماته
وحنا الذي فينا ترسّى رواسيه
الشعب وملوك العدالة ولاته
مشيّدٍ صرحه رفيعه مبانيه
فوق السحاب المعلي نايفاته
تطاولن مجده، ومعزه، وتنزيه
عن كل ما يجرح حيا مكرماته
مصيون ما احدٍ يقترب من حواميه
يحمي حماة وتحفظ مجلداته
المملكة عزه ومنها مياديه
يا منبع الاسلام ومقدساته
عيشي بامان الله وشعب سقيتيه
حبٍ مشارك به رضاع امهاته
عليه شب ولا تغير مباديه
يا سرع ما لك لد بالالتفاته
يا ام المكارم والشرف لادعيتيه
ان كان ليلك ما اهتنيتي مياته
يحرم علينا نوم ليل سهرتيه
والله لتظهر دونك الاستماته
يالغاليه ما نذخره لا طلبتيه
عمر الفتى في عز راسه طراته
والا المذله ما بها ما يطرّيه
"مدارات شعبية"