أسهر مع الليل ونجومه تحاكيني
أسهر مع الشعر وأدخل عالم ثاني
الليل يمضي وانا شعري يخاويني
عبر العواطف يحرك ساكن اشجاني
يا مالك القلب يا نبض بشراييني
يا عطر يغمر عبيره كل وجداني
يا رائع الوصف يا فارس مياديني
يا بهجة العمر كله واعذب الحاني
مافيه واحد بها الدنيا ملا عيني
إلا انت نورك بهرهم قاصي وداني
محيت تاريخ عمري واروع سنيني
واخترت حبك بداية لكل أزماني
وتركت درب لقلبك ما يوديني
وقبلت لأجلك بدربك كل ما جاني
لوضعت منك ترى قلبك يراعيني
قلبك يدلك على قلب وتلقاني
دنياي قلبك عن العالم يكفيني
ما دام بيتي فؤادك وأنت ترعاني
من شاف عيني عرف ما بينك وبيني
يشوف صورة حبيبي بين أجفاني
ومن أجل حبك بدا كل يعاديني
فيك احسدوني بنات كانوا أعواني
حبك كشف لي حقائق أثرت فيني
كانت بعيدة عن أفكاري وتحفاني
خلعت عنهم قناع الزيف بيديني
لين ظهرت لي ملامح كره عدواني
ما دام قلبك على نبضه يغنيني
وش لي بناس أملها شوفة أحزاني
ما دام حبك مطر يروي بساتيني
باتراك جفاف الصحاري لواحد ثاني
"مدارات شعبية"