سيدي والعمر مره ومن عقبه زوال
ما يخلد اسم الأبطال كود أفعالها
يا حفيد شيوخ حكام من روس الرجال
مهجعين الشر قبل نتفيأ ظلالها
بين موحد مملكتنا على روس الطوال
سيرته في ذروة المجد محدٍ طالها
وطير شلوى بن مساعد إلياحل المجال
راعي الشلفاء وخيّال خيل أبطالها
وشبل من له يصهل العز بأفعال ومقال
أبو سعود الحزم والعطف غيث إمحالها
جيت أهني المرتبه فيك يا وافي الخصال
لك رقت ما أنت الذي سيدي ترقالها
إنت فعل إنجاز عزمك على غيرك محال
من حسمها عقب ربي شرب فنجالها
الخطوب المدلهمة تبي رسي الجبال
نادرٍ يبخص ظواهر وخافي حالها
صبر بلا حكمة وقوة ولو طال المطال
ما يفيد بناس دايم عقيم إجدالها
الوطن يفخر بجهدك على مر الليال
شرق غرب نجد جنوب مع شمالها
منهج أمتنا وسط لا غلو ولا إبتذال
والتنطّع والبدع ما قربنا جالها
ومن نوانا بالخدع نكشفه في كل حال
والخطوط الحمر عسره على جهالها
طغمةٍ لظاهر الدين جاء فيها إنتحال
لين مست شمس الأيام مكر إحبالها
إنكشف زيف المقنَّع وأبو وجهين زال
ومن يخون الدار ما يعتزي برجالها
كاملٍ عقل المواطن ولله الكمال
والهماج المر ما هو سوى وزلالها
الولاء لإخوان نوره من أول مثل تال
وذي فئة ضلت وكلٍ عرف ضلالها
بين قتل أطفال وتكفير وأحكامٍ ميال
نار فتنه من شعلها لقى وبالها
كلنا جند الوطن لأمركم نمشي امتثال
والشهادة دين ودنيا شرف من نالها
"مدارات شعبية"