عطني من أوقات الغلا لحظة الشوق
اسقي ضميري فرحة الود لقياك
لحظة غرامي نظرة الموق للموق
وتكتب لك الدمعة على الخد حياك
نظرة عيوني في عيونك بها ذوق
وقولها يا معذب القلب محلاك
اخيل في عينك نشأ المزن وبروق
وتسقي ضماء قلبي هماليل عيناك
وعند الوداع يصير بالقلب حاروق
وتحرق عيوني دمعتي وقت مسراك
وخايل نجوم علت بالسماء فوق
وعطي عهد لسهيل يا زين مانساك
وان طالت الفرقا على الهم مسيوق
ويسري بي الهاجوس واعيد ذكراك
لك ذكريات الامس قاف وطاروق
وغنت لي الموال لا شفت حلياك
"مدارات شعبية"