كلن يموت ويندفن فالثرى ميت
إلا انت ما مت في قلبي احياك
كابرت في عيني ابحبسك وازريت
يلله عسى الجنة تباشر بلقياك
يللي بدينك ممتثل.. به تحليت
آسف.. أنا مقدر ابد يوم أنساك
كل الزوايا اليوم تبكيك بالبيت
وكل القلوب اليوم تبكي فقدناك
عاري انا سري لو لغيرك أفظيت
وعاري أنا دمعي لو لغيرك أغلاك
دمعي عزيز وعزته فيك أبكيت
وعمري وحياتي كلها دوم تفداك
قلتلي ما مثلي أبد شخص حبيت
وكانت ختام اجمل بها شعور ناداك
رمزي. أنا آسف لو فحقك اخطيت
وآسف ترى الكلمة ما تلحق جزاك
كل البشر تبكيك بيت ورا بيت
وكل التعازي تنتعزا بمعزاك
فكري حلالك مالك القلب والصيت
وعيني وروحي مالها الا محياك
والله كئيبة سفرتي وما تعشيت
حتى العشا ناطر تطوله بيمناك
اعذرني والله مالي الا انت اعطيت
بعضي وكلي يا عسى بعمري افداك
لا ما نسيتك بأذكرك كل ما مسيت
لا ما رثيتك شوف كلي ترى جاك
شعري يحبك.. لأجله اليوم لبيت
دايم خيالك ساكن (إهنا وهناك)
ياللي كسبت الكل لا من تحديت
يا للي ملكت قلوب لا مانسيناك
لاشفت ذكرى ذكرها عنك صديت
ولا شافتك عيني نزف جرح ذكراك
عساي اقدر أو عسى بكلمتي (ليت)
تعيد ماضي لا بكينا وذكرناك
"الريـاضيـة"