يا هن أنا ماني بجرف هيالي
من لد يمي يرتكي له على جال
من لاذ بي عده على راس عالي
مشوهق عالي على كل ما طال
ومن صد لو انه قريب موالي
اصد عنه ولو لفوا منه ما سال
رفيقنا دايم نجي له ظلالي
نظلله لامن ظل الشجر زال
اللي على الاول ورثناه تالي
جينا ووصونا على طيب الافعال
ومنا الاجمال اللي تشيل الحمالي
ومنا الزحول اللي يشيلون الاثقال
الطيب لو يشرى شريته بمالي
نفسي تحب الطيب لو ينفد المال
ما اقول انا اطيب طيبين الرجالي
للمرجله مثلي عشاشيق ورجال
لا شك انا معهم على قد حالي
كل يبا يذكر على قد ما نال
ولا نستمع في قول قلته وقالي
شذابة الغافل مواريث الانذال
الله لا يجعل للانذال تالي
خلاقة المشكل مجددة الاسمال
"مدارات شعبية"