والله لولا الخوف من ربي وكرهي للذنوب
كان أقول إن التراب أبعد عليك من النجوم
يا إلهي تطمئن بذكرك أرواح وقلوب
لا إله إلا أنت نسجد له ولا غيرك يدوم
يا العظيم ياللي في علمك جنة ونار وغيوب
تنجي أمي من عذاب النار والقبر الكتوم
يمه الله اللي يعلم يوم أودعك مغصوب
يوم احطك في القبر ما أدري اقوم أو ما أقوم
ما هقيت أمشي ولا خطوه ولا ألحق غروب
من عرفت أن الفراق اليوم صار أمر محسوم
صارت الدنيا تدور ولا عرفت الدرب نوب
مثل الأعمى صرت يمه ما على شرهه ولوم
الوكاد أني غديت بصوب والدنيا في صوب
والحياة الله يجيرك صارت أقسى من اللزوم
كلما أذكرك يمه ينحرق شمع ويذوب
يختنق صدر المفارق كثر ما صار محروم
أذكرك وأنتي هنا وهناك يا صعب الهروب
وين ما أناظر أشوفك في عيوني كل يوم
أتخيل طلتك ومشيتك في ها الدروب
حتى صوتك أسمعه نفس السوالف يا رحوم
صار بيتي في عيوني موحش وكله عيوب
من رحلتي لا خبر لا علم ولا عين تنوم
ما بقي للبيت نور وما بقي للجرح ثوب
ولا بقى إلا ذكريات بيني وبينك تدوم
يمه الله لا يعاقبني ولكني أتوب
ليت ربي ما خلق فرقا ولا موت وهموم
أدري الجنة تحت رجليك ولله الوجوب
اسأل الله الرضا والفوز يا الحي القيوم
"فـن"