يا عبيد حنا ما نسيناك يا عبيد
هذا القدر والأمر لله كله
حنا لنا يا عبيد مثلك مواعيد
نرحل واقاربنا دموعه تهله
دنيا بها الراحل وفيها المواليد
مغرور ياللي حيل مستانس له
ياما خذت من طيبين الاواليد
اللي خذوا بالطيب دقه وجله
وياما خذت من عود واللي على الديد
وياما خذت من لابسات الاجله
للخلد ياللي فاقدينك مع العيد
عيد الفطر بعده ثمانين عله
احس وسط الجوف شبت مواقيد
ما تنطفي بالنيل يا شين مله
والله لو ينجدد العمر تجديد
حلفت لاجدد لياما تمله
لكن تراك احظ يا عبيد من زيد
عمره طويل وفي يساره سجله
"مدارات شعبية"