عز الله انه فاخت الجله رجال
شيخ فقيدة لقحطان وعبيده
لعل له في جنة الخلد منزال
ويعوض ربعه في العقيد الفقيده
جاني الخبر في الحال في الحال في الحال
ويقول ويش اللي نزل في الجريده
قلت الخبر قال الصبر خير الأعمال
أصبر وانا اعطيك العلوم الأكيده
متلعثم في هرجته قال ما قال
يبدي الكلام شوي ثم يعيده
قلت أنت ويش تقول يا طيب الفال
قل لي ترى اللوعات ما هي جديدة
قال الحقيقة راح فكاك الأشكال
راح العديم اللي علينا فقيده
شيخ على شيخ ويصدق لما قال
حلحيل حيل محيل ماشي يكيده
مترك عريب الجد والعم والخال
مترك ليما صار وعد وعيده
فتال ما ينقض ونقاض فتال
بالرأي والنخوة والارياء رشيده
أحياء تواريخ على طول الأجيال
مقدم عبيدة والمواقف سديده
ما هي شياخه شيخ من روس الأموال
اللي يشيخ وشيخته من رصيده
مترك وذيب وزيد راحوا ولازال
شيخة عبيدة عند مقدم عبيده
شيخه شفاليت مثل نايف الجال
واللي على ميراث جده يجيده
مثايل يقولها شيخ الأمثال
مثل الجبال النايفات البعيدة
والحق حق وكلمة الحق تنقال
يا الله يا اللي كل الأرزاق بيده
احفظ بلدنا وادحر وجيه الأنذال
واحفظ فهد واحفظ اخوه وعضيده
واحفظ لنا شجرة وفاء شجرة ظلال
وحنا بخير وفي حياة سعيده
واجبر عزا ربع حلاحيل ورجال
هذا هو المعنى وبيت القصيده
"مدارات شعبية"