بسم الله الواحد المعبود سمّينا
اللي فرض للعباد الدين واركانه
باسمه نسمي واذا جاء الفرض صلينا
وارواحنا في سبيله اجمل ارهانه
يالله ياللي لك احرمنا وحجينا
تحفظ فهد والوطن والشعب واخوانه
حنا جنود الفهد سقم المعادينا
دون الفهد يرخص الغالي على شانه
فهد فهد بس يزهمنا بسامينا
يبشر بما يطلبه فدوه لحجانه
حنا لياجا الكلام الصدق وافينا
لاخوان نوره نبيع الروح ظميانه
دون الوطن ما انحسب الموت قافينا
نموت برضه ولا تنصك بيبانه
عز الوطن فوق ما طالوه غاوينا
حنا حماة الوطن من كل خوانه
ياخوان نوره وطنا فوق امانينا
ما نرخصه لين ندفن وسط وديانه
دار الملوك الوفيه دار اهالينا
داراً بها الكعبة أطهر ناس سكانه
داراً نزل فيه قول الله يزكينا
ما يرخصه غير خاين كافر إديانه
يادارنا لا يهمك فعل جافينا
حنا عيالك طريق الحق صدقانه
يادارنا عنك مابه شيء يلهينا
دام الوفاء كلنا يادار جيرانه
وتمت وصلّوا على اللي كمل الدينا
محمد رسول الله اصدق شيء برهانه
"مدارات شعبية"