يا ديرتي لك تهون الروح ما هنتِ
يا هامة العز تبقى رايتك حره
روحي ودمي وناسي وعزوتي انتِ
يا درة الكون ما غيرك أبد دُره
دبرة امان لكل الناس ما خنتِ
واللي بنى ساس عزك للولي دَره
دارٍ حكمتي بشرع الله وأمنتِ
واهلك هل الدين والتوحيد والفطره
يا تاج راس الكرامة كم تمكنتِ
من نصرة الحق في سره وفي جهره
انتي زرعت ترابك خير واحسنتِ
ومن عاش بترابك الطاهر رفع شكره
خيرك وصل للكثير وما تمننتِ
وأول على العسر محدٍ لك نظر نظره
يا ديرتي كل طيب له تضمنتِ
وبستان طيبك نشر بين الملا عطره
برجال وافعال لأهل الكون برهنتِ
إنك للإسلام عز وللعرب غره
لو لانت جبال . . لاهل الشر ما لنتِ
ومن كاد لك شر يرجع كيده لنحره
عروسة المجد برجالك تزينتِ
يا مشرق النور يا شمسه ويا بدره
جمالك اللي على عرشه تسلطنتِ
تعجز حروفي توفي منه لو ذره
يا لوحة في سما العزة تلونتِ
ويا قصةٍ زين التاريخ بك سطره
وقصيدةٍ في احساسيسي تلحنتِ
وغنيتك بصدق حبي رافع النبرة
وبداخل الروح بيتٍ فيه دونتِ
غلاك بالشطر الأول والوفا شطره
اغيب وانني بوسط الروح كوَّنتِ
شوقٍ عظيمٍ لشوفك يلتهب جمره
لا غيَّر الله لك عزك ولا شنتِ
ويدوم لك مجدك اللي بالسما قدره
"مدارات شعبية"