يا شباب الدين ياللي وصفهم انه غيور
يللي فزعتكم صداها واصل لأقصى الديار
احذروا ثم احذروا من دنيةٍ فيكم تدور
باكر اللي تنشرونه ينتشر زود انتشار
وش لكم في صورة اللي ضيقت كل الصدور
بنت مصوينة قدرها تنكشف لك بانجبار
بنت تنظر في شبابك غيرةٍ منك تفور
تنتظر منك الشجاعة ثم ترد لها اعتبار
استر اللي جاك وامسح صورةٍ هزت جذور
واعرف ان الدين يبقى حتى وان طال انتظار
خل تفكيرك كبير ولا تظنك بمعذور
قدرة الله لو تصيبك ما تلاقي لك فرار
الله اللي يبتليك بفعلتك هذي دهور
في خواتك أو بناتك ينكشف عنهم ستار
وقتها ما ينفعك عض الأصابع والغرور
وقتها تشرب مثل ما شربت البنت المرار
"مدارات شعبية"