جيت من عصر العماير واشكر عصور الخيام
عايش عصري ومتشكر لعصر الأولين
لا براسي جاهلية ولا سلة حسام
واحدٍ وإنسان عادي فرد من هالطيبين
يمكن أمد النظر للنفل، واشم الخزام
ويمكن افضل على هاذي وذي الياسمين
الله يعظم بلادٍ أَنهت أَلد الخصام
واغمضت عين الحرايب وقصرت مد اليدين
وحقنت دم الصحاري عقب ما هي كل عام
راوية من دم أهلها واهلها صايمين
يوم ما بالديرة اللي يفك خط ولا كلام
جاهلين وما هي بسبة ولكن جاهلين
اصح- يا نايم ويا موسد على ريش النعام
وامش في سيرة التاريخ وحال الاقدمين
والله انه مر وقت ما سلم حتى الحرام
نهْبته ما تاخذ من الوقت- إلا طرف عين
يوم وجه الحل ما هو بين ووجه الحرام
والدهر شين على الناس- والجو شين
ودي خذ لي مراية واقلب الأحوال عام
اعتقد ما راح يستانس سوى المتخلفين
تحسبون الجوع ما داج بالديرة وحام
ولا لفح وجه الكبير ولا قصف عمر الجنين
يوم موت الناس ما يدري طفش ولا سقام
والعيادة وسط خبة والروشته مطرقين
واعتقد لو إن دام الحال كان الموت دام
لاسمعنا خط قلب ولا غسلنا الكليتين
ما نتشاءم نسأل الصحة لنا وحسن الختام
بس اذكر، والتذكر يفيد المؤمنين
قال واعتصموا بحبل الله يا أهل الاعتصام
ولم يقل كونوا حيارى بكل وادي هايمين
الامانه عيت تشيلها السود العظام
والسموات العلى والارض كادت لاتبين
قيمة الإنسان لا منه صعد مثل الغمام
خيره ونفعه وظله على الناس اجمعين
ومن يجي وهو عارف حد تطبيق الكلام
غير من وده ولا صقلته تجاريب السنين
ومن يحط الناس بين عيونه ويرجع ينام
ليه ما خلا حوال الناس مع غيره تزين
ومن يحط المقدرة والمعرفة والالتزام
نصب عينه يبي يعينه معين الطيبين
كان نفعي ما تعدى الربع وعيال العمام
وين حق الناس عندي وحق المسلمين
والله اني نوب اشوف افكار ما هي بالتمام
ناقصه من جهل راعيها وفيها قل دين
التعصب والتمذهب وتكبير الكلام
وكيد هذا بحق هذا وظلم الابعدين
قبل لا تاصل عليك بوصل حبل الاعتصام
كل مسلم تراه اخوك ومن الاقربين
وحنا والله ما نبي غير حسن الانتظام
وخدمة المستاهلين وشوف حال المعوزين
والله ان كل اجتماع فيه خير ما يضام
عامر من كل صوب- مبارك في كل حين
اتحرى لمة الأهل وفيض الانسجام
بين هذا وذاك وهذا ولا بين الناس بين
المصالح حاضرة واحدة والخير عام
والقلوب الدين يجمعنا وراي العاقلين
"الانتخابات البلدية"