سلموا لي على وزارة الداخلية
واعتنوا بالسلام ووصلوه الوزير
والرسالة ليا وصلت مع أطيب تحيه
يا عساها توضح ما حتواه الضمير
كلمة الحق غير أقولها ما عليه
بيض الله وجهك يا سمو الأمير
أنت نايف ونايف بالوفاء والحميه
الأمن يفتخر بك وأنت فخرك كبير
ما تخاذلت يوم ولا نحرت المطيه
القوافل على عزم وقناعة تسير
في قيادة سموك ما يهاب المنيه
من مدير الإدارة الين حتى الخفير
ما تعاطفت لصاحب النفوس الرديه
قاسي الرد رديته ولا هو كثير
من يبي الشر يلقى السيف والبندقية
ومن يبى الخير يلقى عندنا كل خير
كلمة قلتها ما هي لك الله غبيه
كلمة يسمعونه زين عبر الأثير
ناس أغواكم ابليس وحرفكم سويه
زاد طغيانكم حتى وصل للصغير
وش هدفكم ورى قتل النفوس البريه
ما تخافون من يوم احسابه عسير
ما تبعتوا كتاب الله وسنة نبيه
في تصرفكم الطايش وفعل يصير
ارجعوا للصواب وخلوا العنجهيه
لا تقولوا حنا غير والناس غير
واعلموا لو نويتم للخطر ألف نيه
كل راعي خطر وراه جندي خطير
وكل منهو وقع خله يعلم خويه
قل عن رجال نايف مانت لاقي مطير
في قيادة سموه ما يهاب المنيه
من مدير الإدارة لين حتى الخفير
"مدارات شعبية"