يا هوى الطايف ونسمات الورود
قابل الزوار بالزهر الندي
واهدهم رمانها حمر الخدود
واسقهم ماها القراح القرهدي
ديرةٍ مال الكرم فيها حدود
خلدوه الأمس واليوم وغدي
المناظر والمآثر والسدود
ترشد السايح بليا مر شدي
تنثر الريحان بدروب الوفود
وتنشره عبر الهوى المتجددي
ينعش الأرواح ويصفِّي الكبود
في هوى صيفي وزخات إبردي
لو رحلت أحن للطايف واعود
فيه منشايه وبرضه مولدي
ما إيتنكر للجميل الا الجحود
والفضل لاهل الفضل ما يجحدي
مانبي نقصٍ ولانحتاج زود
الوفا موجود قبلي وإبعدي
قالوا ابدى بالسحايب والرعود
قلت باسم اللي خلقها نبتدي
الوطن والشعب من زودٍ لزود
وارتقا بالعلم فوق الفرقدي
يا وطنا ياعسا أمجادك تسود
ما تهز أركانك أفعال الردي
إشرب الماء من غزيرات العدود
صافي المنبع قراح الموردي
وأستعذ بالله من اعيون الحسود
صافي النيه نزيه المقصدي
يا وطنا كلنا لجلك جنود
عشت لا عاشت عيون الرقدي
كل ما أخلصنا وحققنا الوعود
فوق هامات النجوم الموعدي
موطني موطن عزبيت الجدود
شامخ المبنى جميل المشهدي
ارفعوا من مستواه ال سعود
وارتفع فوق الثريا والجدي
يا شباب ابلادنا وافي العهود
للتقدم والبنا يدك إبيدي
عند توحيد المساعي والجهود
تنهض الاوطان نحو السوددي
ما تشوف الخوف غابات الأسود
كل منا لدفاع امجندي
"الطائف 26"