رنة من الجوال في فجر الاثنين
رنة غريبة وقتها قبل الإشراق
منها تكدّر خاطري والخبر شين
قالوا أبويه مسعفينه ولا فاق
وعجّلت يمه والدكاتر مجهدين
عل النفس يجري بروحه وينساق
وما شفت جهد الناس وان جو مجمعين
يحجب عن الأقدار باستار ورواق
وفز القلم وارتاع وقال الحدث وين
واجرى من العبرات من فوق ما طاق
وقال أحضر القرطاس في البال بيتين
اكتب ودون مالفى فوق الأوراق
اكتب بدم القلب صدق البراهين
علوم شيخ كدر النفس بفراق
شيخ عزيز جمّله صبغة الدين
والذكر والتحميد في منطقه لاق
شاكر وصابر والبلا مسه سنين
ويثني على مولاه مع مر ماذاق
جل النوافل ملتزمها عناوين
وصفحات يومه ما طواها بالأسواق
فيه الحمية والكرم واللقا الزين
يا مرحباً بالضيف وان جاه طراق
سبّاق للمعروف وان رد ضعفين
ومواصل الأقراب طوق بالأعناق
وما همته دنياه وكثر الملايين
ولا اجتمع له مال من كثر الانفاق
ورايه سديد لادهى الجمع تخمين
وإذا رمى بالراي رميات تفاق
له زود عز في قلوب المحبين
والحب للمخلوق من وضع خلاق
يالوعة المفجوع في عز الأدنين
مالك عن المكتوب وان جلت الآفاق
وان جا الأجل ما تفتديه السلاطين
ولا يندفع بعلاج طب وترياق
جته المنية في منامه على حين
تسللت يمه كما ختل دراق
والروح سلمها وقد ضم كفين
كنه يصلي ضمها فوق خفاق
للي براها غادرت غمضة العين
وقت السحر بالهون والناس خفاق
عام ألف وأربع بعد ست وعشرين
فاربع تبقن من محرم على ساق
واقفى عن الدنيا ودرب الشياطين
وخلّى مشاكلها لطامع وعشاق
وُسد من اللبنات سبع مع الطين
واقبل على مولاه والساق بالساق
والدار غير الدار هي خير دارين
دار بها للبر من خير ماشتاق
يالله عسا له باب روح ورياحين
ومد البصر بالقبر أنوار واشراق
يالله عساه بجنة الخلد آمين
معطي الجزايل واهب الخير رزاق
يالله تقبل ما دعوه المصلين
اللي دعوا باخلاص من لب الأعماق
بيني وبينه في الثرى مصافح يدين
ويا بعد قربه في الثرى تحت الأطباق
الوالدين لجنة الخلد بابين
باب لطمه الموت وانهاه باغلاق
وختامها بيتين عقب الثلاثين
صلوا على نور البرية في الآفاق
صلوا على مصيبة جميع المسلمين
نبينا المختار ما لاح براق
كبرى المصايب موت سيد النبيين
فيه العزا من صابه الدهر بفراق
"الرأي"