لا واهني اللي عن الناس ومشاكلها بعيد
حضه كبير كبر ضلع ابان واطويق واجا
جنب مفاليق مشاكلها بدنيانا تزيد
ما شاف فيهم ميزة تذكر ولا فيهم رجا
أنا أشهد أنه مستريح بالحياة ومستفيد
ساير زمانه مثل ما قالوا هل العرف ونجا
وقت العنا في كل يوم يطلع بعلم جديد
همه على بعض القلوب الله يعافينا لجا
احدٍ معه صبر ومعه حكمه وله رأي سديد
واحدٍ خطاياه الكبيره ما يغطيها الدجا
واحدٍ تعامل مع جميع الناس بسلوبٍ فريد
ما يلتفت للي مدح بين العرب والا هجا
في ماقفه ثابت وله بالمرجله قسم ورصيد
لا ضاع حق من حقوقه قال يا جعله حجا
صبره مثل صبر الجمل والا ضلوعه من حديد
ما يشتكي ضيم الدهر لو ورد مران وسجا
ينطق بنطق الحق عن نطق الحقايق ما يحيد
له حجة بيضا لها نور يشعشع وابلجا
ما هو مثل بعض العرب تايه عن الرشد وعنيد
فيه العواجه ويتعامل مع مخاليق اعوجا
"مدارات شعبية"