قالوا لي ارثه قلت صعب الرثاء فيه
النادر اللي للثقيلات شيال
هذاك أبو فيصل ولا احدن يساويه
من الفجيعه يا عرب دمعنا سال
ذيع الخبر والحزن بانت مواريه
فهد رحل عنا وفينا الحزن طال
فهد الجزيره غاب عن عين مغليه
مكتوب والمكتوب ما عنه محوال
الشعب حزنه واضحاتٍ معانيه
والحزن عُبر به على كل الاشكال
الشعب ما ينلام في حب غاليه
منهو يلوم الشعب في زاكي الافعال
قاد المسيره والوفاء خصلةٍ فيه
مآثره تبقى على كل الأحوال
في خدمة البيتين تبرز مماشيه
يبذل لعز الدين من غالي المال
والجار ما يرضيه شيءٍ يدنيه
صان الكويت الحر من حقد الانذال
الله من شخصٍ بكلمه يداويه
ومن جاه يلقى له مقامٍ ومنزال
لو اذكر افعاله ابد ما اوفيه
لو زال عن عيني عن البال ما زال
شفنا ملايين البشر جت تعزيه
اللي قطع يومين وآلاف الاميال
كل الشعوب اليوم تاقف تحييه
كفيت ثم وفيت بفعال واقوال
واللي يهون ما في الاضلاع نخفيه
جيّة أبو متعب ترى تنعش الحال
بيعة ملكنا للحكم من اهاليه
يفرح بها كل الوطن واهل الافضال
الشعب يفرح به عسى الله يخليه
غصبٍ على حاسد ومبغض وختال
وولي عهده العدل من مباديه
يفرح بفعل الخير وجزال الاعمال
سلطان معنى الطيب لاحل طاريه
تشهد له افعاله على مر الاجيال
وأمير نجد الله يديمه ويحييه
ويالله عسى دنياه تشرق بالامال
علم السياسه كلمة بين اشافيه
ما له بعصره سيد الحكمه امثال
متوارثين الطيب من فيض اياديه
عبدالعزيز اللي بنا صرح ما مال
صقر الجزيره دار الامجاد بانيه
ثمٍ على دربه مشوا هاك الابطال
وختامها ياللي رجا الخلق ترضيه
عسى فهد في ظل عرشك له ظلال
"متابعة "