والله انه تو ماجا للكتابه
والقصايد باب.. وأسعفني لساني
عن غياب اللي جرح قلبي غيابه
طول وقت الحزن شعري كم عصاني
كيف ابرثي من على العالم مصابه
صعب.. وأبكت غيبته قاصي وداني
والرثائيات ما يمكن تشابه
تختلف حسب الفقيده والمكاني
والفقيد اللي رحل عنا يهابه
كل شاعر.. خوف يقصر بالمعاني
كيف واللي غاب نجم يهتدي به
فوق نجم الجدي وسهيل اليماني
كيف واللي غاب شهم يلتجى به
يلتجي به كل من شاف الهواني
كيف واللي غاب من خاف احتمى به
فزعته تكفي لمنهو جاه عاني
كيف واللي غاب كفّينه سحابه
كيف واللي غاب للأوطان باني
كيف واللي غاب شعبه كم هقابه
في ذراه معلق كل الأماني
كم خدم دين الولي يرجي ثوابه
ما خدم يرجي فلان ولا فلاني
الوطن يبكيه شيبه مع شبابه
واليتيم بفقد ابو فيصل يعاني
لو تساق الروح دونه والقرابه
سقت روحي فدوته والعمر فاني
ما حدث مقسوم والمومن رضابه
ما كتب رب البشر باللوح كاني
لكن أرجي لطف من كل الرجابه
واحد ما له بكل الكون ثاني
يرحم الوالد فهد.. يسقي ترابه
عل ينبت فوق قبره قحوياني
في يمينه يالولي ياخذ كتابه
وأسكنه يارب في ظل الجناني
والعزا إنا بالوطن ربع وقرابه
لو تعرضنا لصعب الامتحاني
والحسود أدمى شفاه بحد نابه
شاف ما عافه ومات من الهواني
قادنا اللي له مكان وله مهابه
بالقلوب.. ومعطي شعبه حناني
ابو متعب حي هالراس وهلابه
ابن من وحد لنا هذا الكياني
اول الغيث امره اللي سرنابه
بين شعب المملكة صوت التهاني
من بداية حكمه الشعب اعتنابه
قال بشرى الخير بهلال رمضاني
وأبو خالد ذخرنا لاجا مجابه
للعدا قاسي وللصاحب لياني
سيد الجود الكريم اللي سمابه
طيب فعل عجز عنه المودماني
سيرة ملوك الوفا عطره تشابه
ما تغير يوم مهما الوقت شاني
الوطن في ظلهم عذب شرابه
والأمن به ساد بأمر المستعاني
ربي اجعل دعوتي لك مستجابه
الوطن عزه تديمه والاماني
واحفظ البيت الحرام ومن سعابه
وأحفظ ملوك لهم قدر وشاني
"مدارات شعبية"