كم واحدٍ مذهول يوم الخبر بان
العفو ماله غير جودك وسيله
يا كافل رزق البهايم والإنسان
يا عالم بالكون عدله وميله
تجبر عزاء شعبن لبس ثوب الأحزان
وتكدر الصافي بيومه وليله
رحل فهد عز المواطن والأوطان
وحس المواطن والبلاد برحيله
وعم الأسى حايل وعرعر وجازان
ومكه وجده والحساء والعبيله
واباعدي واجا وسلمى ورمان
ومنشار وتوارن وضلع الرعيله
وعم القصيم الحزن شيبٍ وشبان
وابها تواسي عاصمتنا الجميله
الموت حق ومنكر الحق غلطان
والعبد ماله بالمقادير حيله
يارافع سبع على غير عمدان
لا تجعل الشده علينا طويله
وتضفي علينا الستر يا عالي الشان
يا خير كل الملا تشتكيله
وتعين عبدالله بعونك وسلطان
على المتاعب والحمول الثقيله
حكامنا الوافين ذربين الأيمان
يلقون ان انكر عميل عميله
هم درعنا الضافي على كل الأمتان
يا نعم والله بالنسب والقبيله
من دور ابو تركي سلايل اكحيلان
ماراح من شهم حكمنا بديله
عسا البقاء باللي بقى طول الأزمان
والميت منهم بالجنان الظليله
لكم العزا يا هل الجمايل والأحسان
من دار حاتم والذي يعتزى له
"مدارات شعبية"