يا حروف الشعر جودي بالمشاعر واسعفيني
وقتك اليومه، عطيني من جديدات المعاني
ما تشوفين المحاجر غارقه من دمع عيني
وما سمعتي صوت قلبي صاح من بين المحاني
نبكي قايدنا فهدنا عزنا طول السنيني
ما يقارب ربع قرن بخير وامان وطماني
واهل مكه والمدينة والوطن كله حزيني
والمصانع والمواني والصحاري والمباني
كل شبرٍ من وطنا ينعي الشهم الأميني
شيد المجد العظيم وصار له قدر ومكاني
كيف ما نبكي زعيم عادل سمح اليديني
للكبير ابن رحيم وللصغير أب وحناني
كم مسح دمعة يتيم وكم سعى واطلق سجيني
وكم لجاله من حزينٍ يشتكي وقته يعاني
أسألوا عنه المشاعر وتوسعات المسجديني
والمجمع فالمدينة يعرفه قاصي وداني
ناذرٍ ماله وعمره خدمة للساجديني
والمبرات العظيمة حطها عطف ولياني
في سبيل الله دايم مرخصٍ بذل الثميني
ومصنع الكسوة دليل وشامخٍ في هالكياني
عظم الله أجر الأمة في فقيد المسلميني
خادم البيتين يعجز ياصف فعوله لساني
نرفع أيدينا وندعي ربنا في كل حيني
يقبله عنده شهيد وبين روضات الجناني
باقيٍ بقلوب شعبه ما رحل ذرب اليميني
سمعة الطيب تراها باقية طول الزماني
عقب قروم العيال اللي بدربه سالكيني
سايرين بدرب أبوهم مامشوا مع درب ثاني
ونعلن البيعه المن هو صاحب العقل الرزيني
ابو متعب رمز والله للشهامه والتفاني
هذا عبدالله ملكنا كاسب دنياً وديني
رجلٍ محنك حكيم ومن عريبين المجاني
سر يا بو متعب وحنا معك في عسر وليني
كلنا جنود لوطنا ما ارتضينا بالهواني
وعشت يا سلطان وانته للوطن حصنٍ حصيني
ما خسر من حط مثلك للعهد سر واماني
نعم والله بالمليك ونعم والله بالعويني
هم عزانا في فهدنا ارتحل والعمر فاني
عقبه حروف القصائد غارقه من دمع عيني
ولا نقول الا يا جعله بين روضات الجناني
"مدارات شعبية"