بالوقت حيرة واشكلت للضوايق
حيرة وهم تخلف دلايل مسيره
في ليل دنيا الغي قادا لحايق
على النهار أظلم وشمسه سفيره
العقل له عين تشوف الحقايق
لكن شكوك النفس تعمي البصيره
الليل مجنونٍ ولو كان رايق
والصبح صحوٍ لو عجاجه يثيره
والغدر حيلة ضعف إذا اشتد عايق
على شديد الباس وغفلا دبيره
الحقد ما يرحم ولا منه طايق
جمر العيون وفوح كبد سعيره
والكبر شيطان يغش الخلايق
كبر نفوس في عقول صغيره
الذيب ما يقنب قيل ما يهايق
يسبر بجاله صادفٍ للأخيره
بخطاك أبعد عن قريب الوهايق
وما يخيب من بأمره يشاور ضميره
للفقر لذة ما أرضت لسان ذايق
بعزٍ وعفه تغني نفسٍ فقيره
كنز القناعة يعطي النفس فايق
وبعض الطمع ذله تكسر حقيره
للمستخير أرزاق ربي وفايق
سنابل الخيره زروع وفيره
"مدارات شعبية"